今次想分享呢位朋友，已經連續做左幾個人的第三者。
而最神奇嘅地方係佢嘅對象全部都係扮冇結婚、扮冇另一半，用單身嘅身份喺交友app呃人落搭。
到佢發現左的時候，對方又會又呃又氹求佢留喺身邊，然後又維持呢種關係。

如是者一個兩個都算啦，呢位朋友連續遇到三次，佢意識到唔對路，就來試吓healing。


佢開場白同我講：「我都唔知點解成日遇到呢啲人渣，我唔想破壞人地關係，有咩方法解決？」
中間嗰句其實好關鍵，即刻會明白佢嘅想法。

我就梗係直接同佢講唔想破壞人哋關係咪分開囉，當你一邊唔分開、一邊又話唔想破壞人哋關係，
係咪即係想對方同另一邊分開，你就可以既唔使做醜人，又可以開開心心同對方一齊先？


後來我地一齊進入療癒的過程，經前世回溯，發現佢經常遇到嘅重複模式原來係源自於佢前世嘅創傷，
呢個課題的起源的確唔關今生嘅佢事。
但係當你現階段已經成為第三者嘅時候，又可唔可以完全否認所有責任呢？

在身心靈呢一行，其實都頗常遇到當第三者的客人，可能因為掙扎，亦可能因為難以同身邊人啟齒。
當然，作為旁觀者，我唔會批判呢一件事啱定唔啱，因為每段感情都唔一樣，作為旁人我無資格講任何野。

但無可否認嘅係，當你成為第三者嘅時候，無論你知定唔知，你嘅存在已經影響緊人哋嘅關係；
而當你已經知道左仍然要繼續，咁你就要諗清楚自己嘅想法同定位。

好鍾意對方想繼續，ok；享受同對方一齊嘅感覺，ok；覺得俾人愛惜好幸福，ok。
任何理由同想法都唔緊要，因為呢啲全部係你嘅自由意願，重要嘅係承認內在的自己有呢啲想法，
承認自己唔係無辜嘅人，亦都承認自己影響緊其他人嘅關係。

搵另一半也好搵工也好，我都頗常教客人一定要承認自己過去做得好同唔好嘅地方：
坦誠、接受、處理，個flow先會去得快，療癒都係一樣。
係今次嘅個案入面，其實佢最大嘅責任係在於將自己放喺一個無辜嘅位置，
唔願意承認自己內心深處嘅想法，亦唔願意承認自己正在破壞他人的感情關係，所以會一路狂loop。
直到佢願意面對自己心入邊嘅黑暗面，個loop終於停低，唔再遇到相同的關係。

每一個人都會有陰暗嘅一面，大家都會有小我、有貪心自私嘅想法，係一件正常不過嘅事。
咁樣唔代表係錯同壞事，亦都唔需要刻意壓制佢唔俾佢出現，因為人就係有七情六慾。
重要嘅係我哋能唔能夠接受同面對最真實嘅自己，以及承受想法及行為所帶來的後果。

祝福大家都有美好嘅一天。

Jeanie
2021