人係好奇妙的，會好自然吸返同你差唔多頻率的事物，好似黑仔嘅時候總係易啲撞鬼，好彩嘅時候會中到六合彩。
所以當你狀態好、ready好，好自然會吸到啱嘅人；同樣地，當你內在未療癒好，業力/創傷吸返黎嘅都好自然係受傷的靈魂。

而好多時你會發現，個啲人總係驚人地似，而且hurt你嘅位更似，令你有種點解我咁慘遇親都係渣渣嘅感覺。
講真，其實只係你吸佢返黎咋。好多時我地潛意識想快速清理哂所有傷害，於是將傷害/創傷/業力相近嘅人吸黎身邊，對方其實就係你要處理的傷（當然對方都一樣要處理）。平時相處中你地嘅交流、對答、爭吵的內容，全部都係訊息，話你知到底你而家要療癒乜野。

當你唔面對、唔正視、唔處理，咁就會形成惡性循環，loop極都係呢種人，點避都冇用，一定中。

有趣的是，通常未處理之前你都會覺得自己超級鍾意佢好想同佢一齊離唔開佢，但到你真係願意去處理，甚至乎已經處理好，你就會發現呢種感覺已經冇咗。
就算呢一刻你話我真係好鍾意佢好想同佢一齊我唔處理得唔得，傻豬，如果佢係啱嘅人，第一你哋一早就開開心心處理咗大家嘅傷，唔會咁唔開心；第二要一齊點都一定會一齊，點cut都可以起返埋一齊。

最後，給每一個寂寞少女，其實有啲嘢唔使急，當你真係準備好，療癒好自己，宇宙一定會安排一個啱嘅人嘅俾你，何必勉強迫自己受委屈呢？

 

祝福大家都可以放低唔適合的人事物，早日擺脫惡性循環。

Jeanie

Apr 2020