隨住靈魂藍圖越來越清晰，開始更多唔同既分享同工作坊，我慢慢明白到前世回溯對身心靈發展的「幫助」。 當然我唔認為任何情況都適合做，如果係內在小孩同靈魂碎片，一定要睇返個案本身情況如何，先知道前世回溯有冇幫助。而我最近發現，以下兩類型都頗適合做前世回溯，幫助今世將件事處理得更好。 .
.
- 靈魂使命
知道「靈魂使命」係乜一啲都唔難，但係得到呢個訊息，知道自己要做啲咩之後，點解要做呢樣野、點樣去做，同埋要做到咩地步，唔係單靠冥想或者抽卡就可以得到完整的答案。當然你可以用唔同既工具，例如SRT、Akashic Record等等等等，去得到更多的訊息。

但係我好相信有啲感覺一定要自己親身經驗／接觸過先會體會到，由他人把口話你知同自己感受到一個完整的full picture，絕對係兩件截然不同的事。所以如果可以重新經歷／睇多一次前世既經歷，你會更加明白點解自己會有呢個使命，以及點樣可以做得更好。 .
.
- 人生課題
老實講，我以前一直都覺得課題未課題，我知道前世有野未處理好，咁今世處理好佢囉，我唔需要理會前生發生過咩事，因為靈魂得一個，人梗係應該處理當下的問題啦。

直到我最近接觸左幾個Case，我得到既結論係，前世回溯唔係為左治療前世，而係令你更深刻同立體地明白到底之前發生過咩事，造就今世既你面對呢個課題。而你見過前世的畫面，你可以更加明白呢個課題到底發生咩事，點解我會經歷，點解我會遇到邊個邊個，而我到底要點做先拆解到。

無論見到咩畫面，帶來的結果都係幫助你更好地處理自己的課題。

當然前世回溯有好多方式，除左我自己做之外，我都試過出去催眠而係完全失敗既（我係冇辦法被催眠的人）

坊間亦都有好多令你更放鬆、更容易見到畫面的渠道同工具，但就我而言，所有野都必須係自己一步一步經歷同體驗先係最真實，人既力量同信念可以好強大，每個人都有能力自己見到最真實最正確的畫面。因為at the end，無論係你自己定係你既高我，都係得一個最終目標：活出更好的自己。

只要抱住呢個intention，一切事情都會順利解決到。

祝福大家活出真我，搵到最適合自己的工具幫助自己。

 

Jeanie

Apr 2020