解答呢個問題之前，問下大家，你覺得生肖運程準唔準？
我唔會話完全唔準，但係唔夠準，對嗎？
如果你認同同一年有幾萬人出世，而每十二年又會再loop，一個生肖根本唔可以好立體咁描述一個人的特質、際遇，咁你就會明白點解十二星座唔夠準。

我地平日講嘅星座只係你出生個一日，以你（地球）為中心，太陽運行到嘅位置。

但係太陽系入面有九大行星（計埋冥王啦），而喺你出世個一刻，每一粒行星同樣有佢運行到嘅位置，例如水星喺巨蟹座、金星喺雙魚座，咁點解睇星座淨係睇太陽唔睇其他行星？

簡單來講，每一顆行星與生俱來的力量同特質都唔同，掌管住我哋人生當中唔同嘅部分，例如外貌、思想方式、事業、學業、婚姻、金錢。
仲未計每顆行星嘅位置亦會互相影響、相位、強弱等等。
假設每個人嘅人生係一副puzzle，占星學中的每個項目都只係當中的幾塊。
我地好難單用一兩塊砌圖就估到哂成幅圖畫，而係要透過佢嘅出生年月日時間地點，一塊一塊咁佢砌出獨有嘅圖畫。
thatswhy每一個人都係獨一無二，而唔會只係一個個單一嘅標籤。


睇一個人，可能我地會先睇外貌，但係單睇外貌，你唔會了解到佢做邊行、幾時結婚、會唔會生小朋友、賺唔賺到錢等等。
同樣地，睇一個星盤可以先睇太陽/上升，但你唔會只睇一顆星/ 星座，咁樣只會令到一個立體嘅人變成平面，甚至只係睇到一兩塊錯嘅puzzle。

占星係一門好高深嘅學問，外國甚至會有專門的degree同master，將佢化成星座，甚至只係太陽星座，唔單止唔夠準，更加好無稽。

雖然聽落好複雜，但係只要了解每一個項目嘅特質同埋佢哋之間嘅組合，其實都可以好容易入門。
如果你都想掌握更加多占星知識，學習更了解自己的人生，嚟緊我會推出線上占星班，以單元形式，由淺入深教大家一步一步砌好呢副puzzle。

歡迎你隨時加入，探索呢個美麗的太陽系！

 

Jeanie

March 2020