有一段時間我的情緒不太好，除左正職上太忙好大壓力之外，亦都因為對外界的某啲事太上心而受到好大的影響，好多事都冇心機去做。

 

呢個狀態起起伏伏咁拖左幾個月，今日又發生左少少事，我突然的起心肝請左一位朋友幫我開阿卡西紀錄，又發現其實好多情緒起伏都源自我自己遲遲未動手處理的課題 ── 要求、進步同壓力。

 

我諗我都係一個對自己有好高要求的人，事事都要做得快、做得好，對自己的失誤會在意好耐，夜晚訓覺都會諗返起個種。而其實我自己又唔覺得係一個大嚴重的問題，又唔影響我生活，冇乜野呀，直到上面講既外界某啲事，我發現自己唔係太接受到失敗，或者持續一段低迷的狀態。我會好在意，諗好多，甚至好緊張好急好想呢件其實根本與我無關的事快啲有改善，快啲解決，切實地影響到我的日常生活。

 

直到啱啱同朋友傾完後，其實無論係任何方面的問題，天使同Master比我的訊息都係：唔洗急，唔好同時間鬥快，所有安排、所有事都會恰好地發生。跟從自己最適當的步伐，用放鬆同舒坦的心去面對，一切都會是剛好的。

 

呢段說話係唔同既問題上面都出現左幾次，除左有啲釋然，其實都有啲感動，因為確確實實地一針見血篤中最關鍵的核心。我自己都成日同客講，有時候太急太想得到，越得唔到，越迫切地想改變，其實只會越見唔到真正的自己。當然，我的情緒同狀態未有咁快可以完全放下，但我相信慢慢來，一切都會越來越好的。我亦都有個感覺可以將呢個訊息分享，或者最近同我狀態接近既人，都可以得到少少感悟呢～

 

祝福大家都可以學會放輕腳步，用自己最舒服的節奏做自己喜愛的事

 

Jeanie
Jul 2021


2024跟進：當然早就冇野啦～