人越大越要明白有啲野冇得勉強，無論係工作、感情定其他範疇，人的能力係有限，而每個人就係有各自擅長、遜色、做到與做唔到的地方。唔甘心既時候，先問下自己：呢份唔甘心有冇用？你可以做到啲咩？

身處香港社會，好多時會有不斷的比較同競爭，我地總係習慣橫向同他人比較。想做到人地都做到的事、想比其他人更好，可能係想證明自己的能力，唔想比人睇死，亦都可能出於妒忌，唔想輸。

誠然，比較同爭勝心絕對可以令人有更動力，推動自身變得越來越好；但過於強烈的勝負慾同攀比，反而會令人迷失，失去原本的初心。

曾經我係某個範疇都有好強烈的爭勝心，因為曾經受到惡意批評同打撃，我更加覺得自己唔可以輸，係好典型的「唔想輸」。但慢慢地，原本有興趣先開始做的事變得功利，亦墮入左一個不斷比較同競爭的圈套。回過頭去睇，其實一開始就唔應該太執着於比較，只不過人一旦有唔甘心嘅心，就好似打開左慾望的牢籠一樣，唔想自己輸。

慢慢我開始明白到，唔甘心第一係源自對自己能力的誤解，以為自己可以做得更好、企得更高，當成果同自己預想的不符時，就會產生唔甘心的情緒。第二係由於比較同爭勝既心，實在太想贏，又由此而唔甘心。

無論係邊一種都好，其實都係對自己有錯誤的幻想同期望。因為你會為左達到目標而不斷努力又努力又努力又努力。但係呢個世界又好多野本來就係徒勞無功，好似感情咁，你以為自己可以得到對方的愛，唔甘心輕易地放棄，不斷付出又付出，到頭來只會令自己更難過。

講到感情，其實好多個案中的狀況都係知道與對方存在問題，知道關係已經無法再繼續，但就係呢份唔甘心，令你唔捨得同唔想放手，往往反而投放更多，最後徒勞無功。

當然，我唔係勸大家要認命、放棄，有目標唔係咩壞事。但我希望大家可以清晰認知自己當下的狀況同自身能力。有啲目標做唔到，學識俾自己選擇放棄，止蝕離場，唔好因為唔甘心而咬咬牙繼續勉強自己，最後痛苦嘅都只有自己。

咁所以，祝福大家在適當時放下你的不甘心，讓自己放下執着，重新走向更舒適放鬆的道路～

 

Jeanie

2022