近來見到一個說法，話水星係太陽系嘅地獄，因為經常逆行搞到資料、交通立立亂。我忍唔住諗，冇左水星先係真正嘅地獄喎

水星掌管思考、溝通、表達、交通、訊息、資訊科技等等等等，一切關於交流溝通都歸佢管。有水星，我地先能夠順利與人交流，計劃，甚至去旅行順唔順利都要睇佢頭。

至於好多人怕水星逆行，其實只係水星平時行得太快，當超越地球嘅時候，佢需要慢慢行去等一等地球跟上啫，實際上佢冇行返轉頭囉。

水星逆行，尤其逆到命盤上一啲重要宮位時，的確係好甘的，壞電話電腦冇哂啲email甚至容易同人嗌交都好常見，但係值得留意嘅係水逆係一個非常能夠俾機會自己深層思考嘅時間。

水逆會令到本來思考嘅事情或者進行當中嘅計劃有唔同變化，亦都會令之前一直忽略或者覺得冇乜所謂嘅事放大，非常適合回想同反思。

今次水逆又加埋南合火星，好值得我哋回想過去，身邊幾位朋友都不約而同地因為水逆產生左「唔想將就」的心態，正好反映水星順行嘅時候，有時諗住「袋住先」就算，可能你個心根本就唔想呢！水逆咪就係俾個機會你諗清諗楚自己到底想點囉～

少少題外話，其實好多人都命盤水逆，但唔見得有咩大問題，反而係諗嘢講嘢做嘢嘅方式都同其他人好唔同，創意都爆棚（自己讚自己），所以水星逆行真係唔係一件大不了嘅事😹
-
祝福大家水逆期間順順利利，做好back up保障自己，順便諗下其實你最想要嘅係咩，就可以大步𨂾過～
-
🧙🏼‍♀️ Jeanie

March 2020